Jo que vei a lusir lo dia. Que son sheis òras e mieja.
Que'm cau lhevar. Que'm sorteishi lo cap de la coishinèra. Qu'espii
per la pòrta-frinèsta. Monde, auràs cambiat uei ? Que viri los
uelhs de cap tau desvelhader. Que son sèt òras manca lo quart.
Que'm quiti la crampa shens brut. Que'm pausi davant la television,
Euronews enqüèra. Qu'i
vei la hamièra d'un poble desconeishut. Que preni lo jornalet. Que
viri las paginas. Lo monde n'a pas cambiat. Que m'estanqui sus
un article. Qu'i
vei quauquarren de navèth : un
òmi qui s'estanca de minjar tad ua idèa ? Que'm pausi la question.
E podem forçar quauquarrés de desaletà's ? Quina idèa defen lo
poble desconeishut ? Quin explicar aqueras caumas ? Que m'espii lo
dejunar. N'èi pas mei hami.
Que'm quiti l'ostau en
pensar. N'èi pas hrèita de
la veitura uei. Que camin per las carrèras minutas sancèras.
Qu'arribi au cap de l'avienguda de Tarba. On vau atau ? De cap a la
ciutat que pensi. Carrèra de
la caussada, n'i soi pas
jamei passat a pè. D'un còp sec que m'estanqui tà léger «Honset
Francés Jacmes». Que me n'arridi en pensar a l'aso, lo qui camin au
ras deus agreulons. Que hèi com eth en contunhar de seguir la via.
Que vei a ma dreta la carrèra de la coma. Qu'espii los gojats a
passar. Que'us saludi, ne
m'arresponen pas.
Que persegui per la caussada.
Que m'estanqui un còp navèth davant
un ostau. Qu'i vei un panèu : Còp de poç,
especieria sociau.
Qu'entri
en espiar lo monde qui s'i tròban. Que'us saludi, que m'arresponen.
Que vei neuritud com au subermercat, mes açí ne's ven pas. Que
parli dab un òmi, un sénher
Pon. Que'u demandi çò que haci. Que'm ditz que balha viòca a'us
que ne pòden pas minjar autrament. Ací tanben que i a monde qui hèn
la cauma ? N'ac sabí pas. Que'u demandi : Quau idèa e defenen ?
Que m'espia intrigat. Que m'arrespóner en sorríder : Que defenen
l'idèa d'un monde mei juste. Un
monde mei juste ? Quin podem har aquò shens minjar ? Que saludi lo
monde qui esperan dehòra. Que parteishi en pensar.
Au ras de l'especieria
que m'estanqui. Que tròbi lo banc d'un acès-bus. Que m'i pausi.
Intrigat que'm perdi los uelhs au vueit. Que soi en cauma. Ne voi pas
mei minjar tampòc. Jo tanben que defeni ua idèa. L'idèa
d'un monde shens cauma on tots e pòden minjar. On la viòca i ei a
gratís. On lo gaspilhatge ei un crimi. Que vei lo monde partatjar
los prats. Que'n partatgi de grat la fruta. Que balhi temps com eths
au servici agricòla. Que vei ua tèrra shens proprietari. E puish...
Jo que vei a lusir lo
dia. Que son sheis òras e mieja. Que'm cau lhevar.
Cap comentari:
Publica un comentari a l'entrada